📰 वाळू घाटाच्या वादातून भाजप नेते भरत नागपाल हत्या प्रकरणात मोठी कारवाई – फरार तीन मुख्य आरोपी LCB च्या ताब्यात

📰 वाळू घाटाच्या वादातून भाजप नेते भरत नागपाल हत्या प्रकरणात मोठी कारवाई – फरार तीन मुख्य आरोपी LCB च्या ताब्यात

वरोरा / चंद्रपूर :-  वरोरा तालुक्यातील रेती घाटाच्या वादातून झालेल्या भाजप नेते भरत नागपाल यांच्या हत्याकांडात पोलिसांनी मोठी कारवाई करत फरार असलेल्या तीन मुख्य आरोपींना अटक केली आहे. ही कारवाई स्थानिक गुन्हे शाखा (LCB) आणि पोलिसांच्या संयुक्त पथकाने केली असून या प्रकरणातील तपास अधिक वेगाने सुरू आहे.

News reporter :- अतुल दिघाडे

माहितीनुसार, वना नदी पात्रातील बामर्डा रेती घाटावर पैशांच्या व्यवहार आणि सीमांकनाच्या वादातून दोन गटांमध्ये तुफान हाणामारी झाली. या वादात पुलगाव येथील भाजपचे शहर महामंत्री भरत दयानंद नागपाल यांच्यावर तलवारीने वार करण्यात आला. गंभीर जखमी झाल्यानंतर त्यांना नदीत फेकण्यात आल्याची माहिती समोर आली असून त्यातच त्यांचा मृत्यू झाला.

घटनेनंतर परिसरात तणाव निर्माण झाला होता. पोलिसांनी तत्काळ गुन्हा दाखल करून तपास सुरू केला. या प्रकरणात प्रफुल्ल उमाटे, सुनील झोरे आणि अतुल मोटघरे या आरोपींना अटक करण्यात आली असून इतर फरार आरोपींचा शोध सुरू आहे.

तपासात असेही समोर आले आहे की, रेती घाटाच्या व्यवहारात मोठ्या रकमेचा वाद निर्माण झाला होता. या आर्थिक वादातूनच दोन्ही गटांमध्ये हिंसक संघर्ष झाला आणि त्याचे रूपांतर थेट हत्येत झाले.

दरम्यान, या घटनेमुळे वर्धा व चंद्रपूर जिल्ह्यात खळबळ उडाली असून रेती व्यवसायातील वाढत्या गुन्हेगारीवर प्रश्नचिन्ह उपस्थित झाले आहे. पोलिसांनी या प्रकरणातील इतर आरोपींचा शोध सुरू ठेवला असून तपास पुढे चालू आहे.

:-  रेती घाटातील आर्थिक व्यवहार आणि वर्चस्वाच्या वादातून घडलेले हे हत्याकांड विदर्भातील रेती व्यवसायातील वाढती गुन्हेगारी पुन्हा एकदा समोर आणणारे ठरले आहे.