📰 माजी मंत्री आ, सुधीर मुनगंटीवार यांच्या प्रयत्नांना यश — बल्लारपूरमध्ये न्यायालय इमारतीच्या उभारणीला सुरुवात

📰 माजी मंत्री आ, सुधीर मुनगंटीवार यांच्या प्रयत्नांना यश — बल्लारपूरमध्ये न्यायालय इमारतीच्या उभारणीला सुरुवात

भव्य, आधुनिक आणि अत्याधुनिक सुविधांनी सज्ज न्यायालयीन भवनाच्या भूमिपूजनाचा शुभारंभ उद्या दिनांक १६ नोव्हेंबर रोजी

बल्लारपूर :-  बल्लारपूर शहरासाठी ऐतिहासिक ठरणारा आणि न्यायव्यवस्थेच्या बळकटीकरणासाठी अत्यंत महत्त्वाचा असा क्षण उद्या साक्षीदार ठरणार आहे. राज्याचे माजी वने व सांस्कृतिक कार्य मंत्री आणि बल्लारपूर–चंद्रपूरचे लोकप्रिय आमदार श्री. सुधीर मुनगंटीवार यांच्या सातत्यपूर्ण पाठपुरावा, अभ्यासू दृष्टीकोन आणि शब्दाला कायम जागणाऱ्या नेतृत्वामुळे बल्लारपूर न्यायालय इमारतीच्या उभारणीसाठीचा ३६ कोटी ७० लक्ष रुपयांचा भरीव निधी अखेर मार्गी लागला आहे.

News reporter :- अतुल दिघाडे

या भव्य, आधुनिक आणि अत्याधुनिक सुविधांनी सज्ज न्यायालयीन भवनाच्या भूमिपूजनाचा शुभारंभ उद्या दिनांक १६ नोव्हेंबर रोजी मोठ्या उत्साहात आणि मान्यवरांच्या उपस्थितीत संपन्न होणार आहे. न्यायालयीन यंत्रणा अधिक सक्षम, गतिमान आणि सुटसुटीत करण्यासाठी प्रस्तावित असलेली ही नवीन इमारत बल्लारपूर तालुक्यातील नागरिकांसाठी न्यायप्राप्तीचा वेग आणि व्याप्ती वाढवणारी ठरणार आहे.

बार असोसिएशनच्या जुन्या अनेक मागण्या, न्यायालयीन कामकाजासाठी आवश्यक सुविधांचा अभाव आणि वाढती लोकसंख्या लक्षात घेऊन नवीन न्यायालय भवनाची आवश्यकता अनेक वर्षांपासून अधोरेखित केली जात होती. या आवश्यकतेची संवेदनशील दखल घेत आमदार सुधीर मुनगंटीवार यांनी बल्लारपूर तालुका बार असोसिएशनला दिलेला शब्द पाळत निधी मंजुरीसाठी सातत्याने मंत्रालयात पाठपुरावा केला. त्यांचे प्रयत्न फलद्रूप होऊन अखेर निधी मंजूर झाल्यामुळे न्यायालयीन परिसरात आनंदाचे वातावरण निर्माण झाले आहे.

बार असोसिएशनतर्फे आमदार मुनगंटीवार यांचे मनःपूर्वक आभार मानण्यात आले असून, “दिलेल्या शब्दाला जागणारे नेतृत्व म्हणजेच लोकप्रतिनिधींचा खरा आदर्श” अशी प्रतिक्रिया वकील बांधवांनी व्यक्त केली आहे. नवीन न्यायालयीन भवन उभारणीमुळे न्यायप्रक्रिया सुव्यवस्थित होण्यास, वकिलांसाठी तसेच न्यायप्रार्थीसाठी सुविधा उपलब्ध होण्यास मोठी मदत होणार आहे.

उद्याचा भूमिपूजन सोहळा बल्लारपूर तालुक्याच्या विकासयात्रेत एक महत्त्वपूर्ण टप्पा ठरू शकतो. नागरिक, वकील बांधव आणि न्यायप्रेमी यांच्यात या सोहळ्याबद्दल विशेष उत्सुकता पाहायला मिळत आहे.

न्यायमंदिराचा पाया… वचनपूर्तीचा दिवस!
सुधीर मुनगंटीवार यांच्या प्रयत्नांची आणखी एक उज्ज्वल कहाणी!