📰 चंद्रपूर भगवान बिरसा मुंडा जयंतीनिमित्त जनता महाविद्यालयात भव्य कार्यक्रमाचे आयोजन इतिहास, संस्कृती आणि सामाजिक जागरूकतेचा संदेश देणारा उपक्रम

📰 चंद्रपूर भगवान बिरसा मुंडा जयंतीनिमित्त जनता महाविद्यालयात भव्य कार्यक्रमाचे आयोजन इतिहास, संस्कृती आणि सामाजिक जागरूकतेचा संदेश देणारा उपक्रम

चंद्रपूर :-  चांदा शिक्षण प्रसारक मंडळ संचालित जनता महाविद्यालय, चंद्रपूर येथे भगवान बिरसा मुंडा यांच्या जयंतीनिमित्त एक भव्य आणि प्रेरणादायी कार्यक्रमाचे आयोजन करण्यात आले. महाविद्यालयाच्या ग्रंथालय विभाग आणि राष्ट्रीय सेवा योजना (NSS) यांच्या संयुक्त विद्यमाने हा उपक्रम पार पडला. कार्यक्रमाला महाविद्यालयातील प्राध्यापक, शिक्षकेत्तर कर्मचारी, विद्यार्थी तसेच स्थानिक मान्यवर मोठ्या संख्येने उपस्थित होते.

News reporter :- अतुल दिघाडे

कार्यक्रमाच्या सुरुवातीस भगवान बिरसा मुंडा यांच्या प्रतिमेस मान्यवरांच्या उपस्थितीत माल्यार्पण करून अभिवादन करण्यात आले. यावेळी चांदा शिक्षण प्रसारक मंडळाचे सचिव डॉ. अशोक जिवतोडे, जनता महाविद्यालयाचे प्राचार्य डॉ. आशिष के. महातळे, ASUSAT संघटनेचे अध्यक्ष प्रा. डॉ. अरविंद शेंडे, सहसचिव डॉ. अशोक काळे, डॉ. प्रकाश इंगोले, डॉ. जुगलकिशोर सोमाणी आदी मान्यवर उपस्थित होते.

यानंतर प्रा. एच. आर. आत्राम यांनी भगवान बिरसा मुंडा यांच्या जीवनकार्यावर आधारित सविस्तर व्याख्यान दिले. त्यांनी बिरसा मुंडा यांचे बालपण, आदिवासी समाजाच्या हक्कांसाठी त्यांनी उभारलेली उलगुलान चळवळ, अन्यायाविरुद्ध त्यांचा संघर्ष आणि भारतीय स्वातंत्र्यलढ्यातील त्यांचे योगदान यावर प्रकाश टाकला. त्यांच्या व्याख्यानामुळे विद्यार्थ्यांना इतिहास, सामाजिक न्याय आणि नेतृत्व यांची महत्वाची मूल्ये समजली.

विद्यार्थ्यांसाठी भगवान बिरसा मुंडा यांच्या जीवनावर आधारित लघुचित्रपटाचेही प्रदर्शन करण्यात आले. या लघुपटातून त्यांच्या संघर्षपूर्ण जीवनाची, समाजाभिमुख कार्याची आणि आदिवासी समाजाच्या उभारणीसाठी त्यांनी केलेल्या प्रयत्नांची माहिती उपस्थितांना मिळाली. विद्यार्थ्यांनी हा लघुपट उत्स्फूर्तपणे पाहून त्यातून प्रेरणादायी संदेश आत्मसात केला.

कार्यक्रमाच्या यशस्वी आयोजनेसाठी ग्रंथपाल डॉ. पी. बी. चहारे, रासेयो कार्यक्रम अधिकारी प्रा. अमर बलकी, तसेच सहाय्यक ग्रंथपाल एस. टी. वाघमारे यांनी महत्त्वपूर्ण भूमिका बजावली. आयोजन, समन्वय आणि नियोजनात त्यांचा मोलाचा वाटा राहिला. महाविद्यालयातील विद्यार्थ्यांनीही विविध उपक्रमांमध्ये सक्रिय सहभाग नोंदवला.

या कार्यक्रमामुळे विद्यार्थ्यांमध्ये राष्ट्रीय एकात्मतेची, सामाजिक बांधिलकीची आणि आदिवासी समाजाच्या योगदानाबद्दल आदरभावनेची जाणीव दृढ झाली. मान्यवरांनी महाविद्यालयाने अशा सांस्कृतिक आणि सामाजिक जागरूकता वाढविणाऱ्या उपक्रमांचे आयोजन सातत्याने करावे, अशी अपेक्षा व्यक्त केली.

भगवान बिरसा मुंडा यांच्या विचारांतून प्रेरणा घेत समाजहिताचे कार्य करण्याचा संकल्प विद्यार्थ्यांनी व्यक्त केला आणि हा कार्यक्रम उत्साहपूर्ण वातावरणात यशस्वीरीत्या पार पडला.

—