💧 रामनगर जलशुद्धीकरण केंद्राची क्षमता वाढली; चंद्रपूरच्या पाणीपुरवठ्याला मोठा दिलासा 💧

💧 रामनगर जलशुद्धीकरण केंद्राची क्षमता वाढली; चंद्रपूरच्या पाणीपुरवठ्याला मोठा दिलासा 💧

चंद्रपूर : शहरातील वाढती लोकसंख्या, वाढती वसाहती आणि उन्हाळ्यात निर्माण होणारी पाण्याची समस्या लक्षात घेऊन महापालिकेने महत्त्वपूर्ण पाऊल उचलले आहे. केंद्र शासनाच्या अमृत योजनेअंतर्गत रामनगर येथील जलशुद्धीकरण केंद्राचे विस्तारीकरण पूर्ण करण्यात आले असून आता या केंद्राची क्षमता १०.५ दशलक्ष लिटरवरून १५ दशलक्ष लिटर इतकी वाढली आहे. त्यामुळे शहरातील अनेक भागांतील नागरिकांना मोठा दिलासा मिळणार आहे.

News reporter :- अतुल दिघाडे

महापालिकेकडून देण्यात आलेल्या माहितीनुसार, रामनगर येथील जुने जलशुद्धीकरण केंद्र अनेक वर्षांपासून कार्यरत होते. मात्र कालांतराने यंत्रणा जीर्ण होत गेल्यामुळे पाणीपुरवठ्यात अडथळे निर्माण होत होते. तसेच शहराचा विस्तार झपाट्याने वाढत असल्याने जुन्या क्षमतेचे केंद्र अपुरे पडत होते. या पार्श्वभूमीवर केंद्राचे आधुनिकीकरण व विस्तारीकरण करण्याचा निर्णय घेण्यात आला.

या प्रकल्पाअंतर्गत नवीन यंत्रसामग्री बसविणे, शुद्धीकरण प्रक्रियेत सुधारणा करणे, पाण्याची साठवण क्षमता वाढविणे तसेच वितरण व्यवस्थेत तांत्रिक बदल करण्यात आले आहेत. त्यामुळे पाण्याची गुणवत्ता सुधारण्याबरोबरच पुरवठा अधिक स्थिर व नियमित होण्यास मदत होणार आहे.

सध्या नव्याने वाढविण्यात आलेल्या क्षमतेची मुख्य जलटाकीशी जोडणी करण्याचे काम अंतिम टप्प्यात आहे. हे काम पूर्ण झाल्यानंतर संबंधित परिसरांमध्ये पाणीपुरवठा अधिक सुरळीतपणे सुरू होईल. नागरिकांना मिळणाऱ्या पाण्याच्या वेळेत वाढ होणार असून विशेषतः उन्हाळ्यात जाणवणारी पाणीटंचाई मोठ्या प्रमाणात कमी होण्याची अपेक्षा आहे.

या विस्तारीकरण प्रकल्पाचा लाभ शहरातील अनेक भागांतील नागरिकांना होणार आहे. त्यामध्ये नगीना बाग, चोर खिडकी, चपराशी कॉलनी, दादमहल, भानापेठ, अंचलेश्वर, महाकाली परिसर, भिवापूर, बैल बाजार, रामाळा तलाव रोड, बगड खिडकी, जलनगर, जटपुरा, हॉस्पिटल वार्ड, बाजार वार्ड, एकोरी मंदिर वार्ड, ख्रिश्चन कॉलनी, पंचशील चौक, रामनगर, बोकारे प्लॉट, राष्ट्रवादी नगर, आंबेडकर सभागृह नगर, ठक्कर कॉलनी, सिस्टर कॉलनी आणि जगन्नाथ बाबा नगर या परिसरांचा समावेश आहे.

स्थानिक नागरिकांनी या प्रकल्पाबद्दल समाधान व्यक्त केले असून, पाणीपुरवठा अधिक वेळ आणि नियमितपणे मिळेल अशी अपेक्षा व्यक्त केली आहे. शहराच्या भविष्यातील गरजा लक्षात घेऊन पाणीपुरवठा व्यवस्था मजबूत करण्याच्या दृष्टीने हा प्रकल्प अत्यंत महत्त्वाचा मानला जात आहे.

महापालिका प्रशासनाच्या मते, शहरातील पाणीपुरवठा व्यवस्था अधिक सक्षम करण्यासाठी पुढील काळातही विविध पायाभूत सुविधा विकसित करण्यावर भर दिला जाणार आहे. नागरिकांना स्वच्छ व पुरेसा पाणीपुरवठा उपलब्ध करून देणे हे प्रशासनाचे प्राधान्य असल्याचेही यावेळी स्पष्ट करण्यात आले.