📰 महाकाली यात्रेच्या तयारीला वेग; महापौर संगीता खांडेकर यांची पाहणी, प्रशासनाला महत्त्वाच्या सूचना

📰 महाकाली यात्रेच्या तयारीला वेग; महापौर संगीता खांडेकर यांची पाहणी, प्रशासनाला महत्त्वाच्या सूचना

चंद्रपूर :-  शहरातील प्रसिद्ध महाकाली यात्रेची तयारी आता अंतिम टप्प्यात पोहोचत असून १९ मार्चपासून सुरू होणाऱ्या यात्रेच्या पार्श्वभूमीवर महापौर संगीता खांडेकर यांनी यात्रा परिसराची प्रत्यक्ष पाहणी करून प्रशासनाच्या नियोजनाचा सविस्तर आढावा घेतला. यात्रेला दरवर्षी हजारो भाविक उपस्थित राहत असल्यामुळे यंदा नागरिक व भाविकांना अधिक चांगल्या सुविधा उपलब्ध करून देण्यावर विशेष भर देण्यात येत आहे.

News reporter :- अतुल दिघाडे

महापौरांनी मनपा अधिकाऱ्यांसोबत बैठक घेऊन यात्रा परिसरातील सर्व विभागांना समन्वयाने काम करण्याच्या सूचना दिल्या. यात्रेदरम्यान होणारी मोठी गर्दी लक्षात घेता गर्दी नियंत्रण व सुरक्षा व्यवस्था अधिक मजबूत ठेवण्याचे निर्देश देण्यात आले. भाविकांना कोणतीही अडचण निर्माण होऊ नये यासाठी पोलिस प्रशासन, आपत्ती व्यवस्थापन पथक तसेच स्वयंसेवक यांची मदत घेण्यात येणार आहे.

यात्रेच्या काळात नागरिकांना मूलभूत सुविधा उपलब्ध व्हाव्यात यासाठी पिण्याच्या पाण्याची पुरेशी व्यवस्था, तात्पुरते आरोग्य केंद्र, रुग्णवाहिका सेवा, अग्निशमन दलाची सज्जता, तसेच अखंडित व सुरक्षित विद्युत पुरवठा यावर विशेष लक्ष देण्याचे सांगण्यात आले. यात्रेच्या प्रमुख मार्गांवर आणि मैदान परिसरात सीसीटीव्ही कॅमेरे बसवून संपूर्ण परिसरावर लक्ष ठेवण्याची योजना आखण्यात आली आहे.

स्वच्छतेच्या दृष्टीने मनपा प्रशासनाला विशेष सूचना देताना महापौरांनी यात्रा परिसरात नियमित साफसफाई, कचरा व्यवस्थापन आणि निर्जंतुकीकरण करण्यावर भर दिला. भाविकांच्या सोयीसाठी पक्के तसेच फिरते शौचालय, स्वच्छ पिण्याचे पाणी, तसेच मोठ्या प्रमाणावर कचरा संकलनाची व्यवस्था उभारण्यात येणार आहे.

वाहतूक व्यवस्थापनासाठी विशेष वाहनतळाची सोय करण्यात येणार असून यात्रेच्या मुख्य मार्गांवर वाहतूक सुरळीत राहण्यासाठी पोलिस विभागासोबत समन्वय साधला जाणार आहे. महिला भाविकांची सुरक्षितता व सोयी लक्षात घेऊन हिरकणी कक्ष उभारण्याचेही निर्देश देण्यात आले आहेत, जेथे महिलांना आवश्यक सुविधा उपलब्ध करून दिल्या जाणार आहेत.

यात्रेच्या काळात कोणतीही आपत्कालीन परिस्थिती उद्भवू नये व त्यावर तात्काळ नियंत्रण ठेवता यावे यासाठी यात्रा मैदान व स्वच्छता झोन येथे नियंत्रण कक्ष स्थापन करण्याचा निर्णय घेण्यात आला. तसेच ईरई नदी परिसरात स्नानासाठी जाणाऱ्या भाविकांसाठी सुरक्षित मार्ग, पिण्याचे पाणी, प्रकाश व्यवस्था व स्वच्छतेची विशेष काळजी घेण्याच्या सूचना प्रशासनाला देण्यात आल्या.

महापौरांनी यावेळी सांगितले की, “महाकाली यात्रा ही चंद्रपूर शहराची श्रद्धा आणि परंपरा आहे. यात्रेला येणाऱ्या प्रत्येक भाविकाला सुरक्षित, स्वच्छ आणि सुकर व्यवस्था मिळावी यासाठी मनपा प्रशासन पूर्ण क्षमतेने काम करत आहे.”

यात्रेच्या पार्श्वभूमीवर मनपा प्रशासन, पोलिस विभाग, आरोग्य यंत्रणा व विविध विभाग एकत्रितपणे नियोजन करत असून यंदाची महाकाली यात्रा अधिक सुव्यवस्थित व सुविधायुक्त करण्याचा प्रशासनाचा प्रयत्न आहे.