📰 भव्य शिवजयंती सोहळा; सोहम बुटले यांच्या पुढाकाराने अथर्व कॉलनीत उत्साह…..

📰 भव्य शिवजयंती सोहळा; सोहम बुटले यांच्या पुढाकाराने अथर्व कॉलनीत उत्साह…..

चंद्रपूर :- अथर्व कॉलनी परिसरात शिवजयंती निमित्त आयोजित करण्यात आलेला भव्य सोहळा नागरिकांसाठी अविस्मरणीय ठरला. समाजसेवक सोहम बुटले आणि अथर्व कॉलनी व वडगाव आदर्श परिवार यांच्या सौजन्याने हा कार्यक्रम मोठ्या उत्साहात पार पडला. कार्यक्रमातील आकर्षण ठरले ते छत्रपती शिवाजी महाराजांच्या ४० फूट भव्य बॅनरचे क्रेनच्या सहाय्याने करण्यात आलेले अनावरण. या अनोख्या उपक्रमाने उपस्थित नागरिक भारावून गेले.

कार्यक्रमाच्या सुरुवातीला ढोल-ताशांच्या गजरात आणि आकर्षक आतषबाजीच्या वातावरणात संपूर्ण परिसर शिवमय झाला. “जय भवानी, जय शिवाजी” च्या घोषणांनी वातावरण दणाणून गेले. शिवाजी महाराजांच्या प्रतिमेला पुष्पहार अर्पण करून व आरती करून कार्यक्रमाची औपचारिक सुरुवात करण्यात आली. परिसरातील नागरिक मोठ्या संख्येने उपस्थित होते.

कार्यक्रमासाठी काही नगरसेवक तसेच महापौर यांनीही हजेरी लावली. उईके सर यांनी कार्यक्रमाचे सुंदर सूत्रसंचालन केले. मान्यवरांचे पुष्पगुच्छ व श्रीफळ देऊन स्वागत करण्यात आले. गणेश मंडळाचे अध्यक्ष पोतदार साहेब यांनी आपल्या भाषणात कॉलनीतील एकोप्याचे कौतुक करत नव्याने निवडून आलेल्या नगरसेवकांना शुभेच्छा दिल्या. तसेच भविष्यात परिसराच्या विकासासाठी सर्वांनी एकत्रित काम करण्याची अपेक्षा व्यक्त केली.

यावेळी प्रदीप आलूरवर यांनी ४० फूट बॅनरचे क्रेनद्वारे अनावरण करण्याची कल्पना प्रथमच राबविल्याचे सांगितले. ही संकल्पना सोहम बुटले यांच्या विचारातून साकार झाली असून सर्वांच्या सहकार्यामुळे हा उपक्रम यशस्वी झाल्याचे त्यांनी नमूद केले.

आपल्या मनोगतात सोहम बुटले यांनी जनसेवा हीच आपली प्राथमिकता असल्याचे सांगितले. “माझ्या रक्ताच्या प्रत्येक थेंबात जनसेवा आहे आणि ती शेवटपर्यंत करत राहीन,” असे त्यांनी ठामपणे सांगितले. त्यांच्या भाषणाच्या शेवटी जय भवानी-जय शिवाजीच्या घोषणांनी वातावरण दुमदुमले.

कार्यक्रमाच्या शेवटी शिवरायांच्या जीवनावर आधारित नाट्यप्रयोग आणि पोवाडा सादर करण्यात आला. या सादरीकरणाने उपस्थितांना इतिहासाची जणू जिवंत अनुभूती मिळाली.

समारोप प्रसंगी मालेकर साहेब यांनी सर्वांचे आभार मानले. कार्यक्रम यशस्वी करण्यासाठी श्री. बंडू भाऊ वासेकर, श्री.खोकले गुरुजी, केसरी नंदन हनुमान मंदिर, श्री.धागमवार, श्री.खोखलेजी, श्री.अमजद भाई, श्री.दोड़के जी, श्री. कुरमथेजी, श्री.संदीप धोबड़े जी, श्री.भूषणवार, श्री.धानकुटे, श्री.संजय बुराण, श्री.गणधारे, श्री.जीराफे, श्री.गोयल, श्री.अतुल जाधवजी, श्री.बंडू वानडुध्येजी, श्री.गोवणेजी, श्री.देवराव वाडरे, तसेच अथर्व कॉलनीतील सर्व लहान मोठया सदस्यांनी मोठ्या संख्येने व उत्साहाने सहकार्य केल्याचे त्यांनी नमूद केले.

या भव्य शिवजयंती सोहळ्यामुळे संपूर्ण परिसर शिवमय झाला आणि नागरिकांनी एकात्मतेचा संदेश दिला.