📰 सोहम बुटले यांच्या उपस्थितीत मूल कृषि महाविद्यालयात ‘स्वच्छता ही सेवा’ उपक्रमाचा 500 वा टप्पा उत्साहात साजरा

📰 सोहम बुटले यांच्या उपस्थितीत मूल कृषि महाविद्यालयात ‘स्वच्छता ही सेवा’ उपक्रमाचा 500 वा टप्पा उत्साहात साजरा

मूल :-  येथील कृषि महाविद्यालयाच्या वतीने आयोजित ‘स्वच्छता ही सेवा’ या उपक्रमाचा 500 वा टप्पा मोठ्या उत्साहात साजरा करण्यात आला. या कार्यक्रमाला विविध क्षेत्रातील मान्यवरांची उपस्थिती लाभली असून विद्यार्थ्यांना प्रेरणादायी मार्गदर्शन करण्यात आले.

कार्यक्रमाचे प्रास्ताविक सहाय्यक प्राध्यापक व राष्ट्रीय सेवा योजनेचे कार्यक्रम अधिकारी डॉ. आशिष लाडे यांनी केले. त्यांनी राष्ट्रीय सेवा योजनेअंतर्गत राबविण्यात येणाऱ्या विविध उपक्रमांची माहिती देत ‘स्वच्छता ही सेवा’ अभियान हे मा. सहयोगी अधिष्ठाता यांच्या मार्गदर्शनाखाली सातत्याने राबविले जात असल्याचे सांगितले.

डॉ. रमाकांत गजभिये (प्राध्यापक, उद्यानविद्या) यांनी फणसाच्या रोपांची लागवड तंत्रज्ञान व त्याचे फायदे याबाबत सविस्तर माहिती दिली. प्रा. चंद्रकांत मणियार (वरिष्ठ पत्रकार) यांनी राष्ट्रीय सेवा योजनेतील आपल्या अनुभवांचा आढावा घेत विद्यार्थ्यांना प्रेरित केले. दीपक देशपांडे (अध्यक्ष, ग्राहक मंच) यांनी विद्यार्थ्यांनी स्वतःच्या हिताचे जतन करण्याचे आवाहन केले, तर विनोद इंगोले (वरिष्ठ प्रतिनिधी, ॲग्रोवन) यांनी महाविद्यालयाच्या कार्याचे कौतुक केले.

यावेळी सोहम बुटले (अध्यक्ष, युवा वॉरियर्स चंद्रपूर) यांनी विद्यार्थ्यांना डॉ. विजय अतकरे यांच्या कार्याचा आदर्श घेऊन स्वच्छतेचा संकल्प करण्याचे आवाहन केले. डॉ. जयश्री गलगलीकर (आर्ट ऑफ लिव्हिंग, नागपूर) यांनी पर्यावरणातील कचऱ्यामुळे होणाऱ्या दुष्परिणामांवर प्रकाश टाकला, तर श्री. चंद्रशेखर गलगलीकर यांनी सेवाभावाचे महत्त्व अधोरेखित करत प्रेरणादायी कविता सादर केली.

या कार्यक्रमाला चंद्रपूर येथून राजुरा येथील शिवाजी महाराज महाविद्यालयाचे माजी प्राध्यापक श्री. मालेकर सर तसेच भवांजी बाई महाविद्यालयाचे माजी प्राध्यापक श्री. खोखले सर यांचीही विशेष उपस्थिती होती.

कार्यक्रमात उपस्थित मान्यवरांचा शाल, श्रीफळ व तुळशीच्या रोपाने सत्कार करण्यात आला. अध्यक्षीय भाषणात सहयोगी अधिष्ठाता डॉ. विजय अतकरे यांनी मे 2017 पासून सुरू झालेल्या या उपक्रमाच्या 500 व्या टप्प्यापर्यंतच्या प्रवासाचा आढावा घेत पुढेही हा उपक्रम सातत्याने चालू ठेवण्याचे आवाहन केले. तसेच फणसाच्या झाडाला ‘कल्पवृक्ष’ संबोधत त्याची लागवड करण्याचे आवाहन केले.

कार्यक्रमाचे सूत्रसंचालन डॉ. गीतांशू डिंकवार यांनी केले, तर आभार प्रदर्शन श्री. नागेश नवघरे यांनी मानले. कार्यक्रमाच्या शेवटी महाविद्यालय परिसरात स्वच्छता अभियान राबविण्यात आले तसेच सोमनाथ प्रक्षेत्रावर सुमारे 70 फणसाच्या रोपांची लागवड करण्यात आली. कार्यक्रमाला प्राध्यापक व विद्यार्थी मोठ्या संख्येने उपस्थित होते.