📰 १५ वर्षांच्या प्रतीक्षेनंतर टोकाचा निर्णय : मोबदला न मिळाल्याने ५ आदिवासी शेतकऱ्यांचा उपविभागीय अधिकारी कार्यालयात विषप्राशनाचा प्रयत्न

📰 १५ वर्षांच्या प्रतीक्षेनंतर टोकाचा निर्णय : मोबदला न मिळाल्याने ५ आदिवासी शेतकऱ्यांचा उपविभागीय अधिकारी कार्यालयात विषप्राशनाचा प्रयत्न

चंद्रपूर, दि. १३ एप्रिल :- जिल्ह्यात गेल्या १५ वर्षांपासून प्रलंबित असलेल्या जमीन मोबदल्याच्या प्रश्नावरून कोरपना तालुक्यातील कुसुंबी येथील ५ आदिवासी कोलाम शेतकऱ्यांनी आज टोकाचे पाऊल उचलत राजुरा उपविभागीय अधिकारी कार्यालयातच विष प्राशन करून आत्महत्येचा प्रयत्न केला. या घटनेमुळे संपूर्ण जिल्ह्यात खळबळ उडाली आहे.

News reporter :- अतुल दिघाडे

माणिकगड (अल्ट्राटेक) सिमेंट कंपनीच्या चुनखडी प्रकल्पासाठी या शेतकऱ्यांच्या जमिनी अधिग्रहित करण्यात आल्या होत्या. मात्र, जमिनींचा योग्य मोबदला अद्याप मिळालेला नसल्याची तक्रार आहे. “मोबदला द्या किंवा जमिनी परत करा” या मागणीसाठी संबंधित शेतकरी गेल्या अनेक वर्षांपासून प्रशासनाकडे पाठपुरावा करत होते.

आज संबंधित शेतकरी आपली व्यथा मांडण्यासाठी राजुरा उपविभागीय अधिकारी रवींद्र माने यांच्या कार्यालयात आले होते. मात्र, वारंवार प्रयत्न करूनही न्याय न मिळाल्याने त्यांनी तिथेच विष प्राशन केले. हा प्रकार लक्षात येताच प्रशासनात एकच खळबळ उडाली.

राजुरा पोलिसांनी तातडीने घटनास्थळी धाव घेत पाचही शेतकऱ्यांना राजुरा उपजिल्हा रुग्णालयात दाखल केले. प्रकृती चिंताजनक असल्याने त्यांना पुढील उपचारासाठी चंद्रपूर जिल्हा सामान्य रुग्णालयात हलविण्यात आले असून सध्या त्यांच्यावर उपचार सुरू आहेत.

या घटनेनंतर प्रशासन व संबंधित कंपनीच्या कारभारावर गंभीर प्रश्नचिन्ह उपस्थित झाले आहे. दरम्यान, आदिवासी समाजात संतापाची लाट उसळली असून, पीडित शेतकऱ्यांना तात्काळ न्याय मिळावा व दोषींवर कारवाई करावी, अशी मागणी जोर धरत आहे.