🚨 ‘बाटली आडवी’ कशी होणार? जिल्ह्यात १८४ मद्यदुकाने महिलांच्या नावावर

🚨 ‘बाटली आडवी’ कशी होणार? जिल्ह्यात १८४ मद्यदुकाने महिलांच्या नावावर

चंद्रपूर : जिल्ह्यात दारूमुळे उद्ध्वस्त होणारे संसार वाचवण्यासाठी अनेक ठिकाणी महिला रस्त्यावर उतरून अवैध दारू विक्रीविरोधात आंदोलन करताना दिसतात. ग्रामसभांमध्ये दारूबंदीचे ठराव मंजूर केले जातात, ‘बाटली आडवी’ करण्याचे आवाहन केले जाते. मात्र, याच जिल्ह्यातील एक वेगळी आणि आश्चर्यकारक बाब समोर आली आहे. जिल्ह्यातील मद्यविक्रीच्या परवान्यांमध्ये महिलांचा सहभाग मोठ्या प्रमाणात असल्याचे आकडेवारीतून स्पष्ट झाले आहे.

News reporter :- अतुल दिघाडे

राज्य उत्पादन शुल्क विभागाच्या माहितीनुसार, चंद्रपूर जिल्ह्यातील एकूण ८४९ अधिकृत मद्यविक्री परवान्यांपैकी तब्बल १८४ परवाने महिलांच्या नावावर आहेत. तसेच ४७ ठिकाणी महिला-पुरुष संयुक्त मालकी असल्याची नोंद आहे. त्यामुळे ‘दारूबंदी’ आणि ‘बाटली आडवी’ करण्याच्या घोषणा होत असतानाच महिलांच्या नावावर मोठ्या प्रमाणात मद्यदुकाने चालत असल्याने समाजात आश्चर्य व्यक्त होत आहे.

शहरी आणि ग्रामीण भागात वेगवेगळे चित्र

जिल्ह्यातील शहरी भागात प्रामुख्याने वाइन शॉप आणि बीअर शॉपच्या परवान्यांमध्ये महिलांची नावे आढळून येतात. तर ग्रामीण भागात देशी दारूच्या दुकानांची मालकी महिलांच्या नावावर असल्याचे चित्र आहे. त्यामुळे मद्य व्यवसायात महिलांची उपस्थिती वाढत असल्याचे दिसून येते.

वाइन शॉप, देशी दारू आणि बारमध्ये महिलांची भागीदारी

जिल्ह्यातील वाइन शॉप, बीअर शॉप तसेच देशी दारूच्या दुकानांमध्ये महिलांच्या नावावर परवाने घेण्याचे प्रमाण वाढले आहे. विशेष म्हणजे रेस्टॉरंट व बार व्यवसायातही १३२ महिला परवानाधारक असल्याची माहिती समोर आली आहे. काही प्रकरणांमध्ये कुटुंबीय व्यवसायाचा भाग म्हणून महिलांच्या नावावर परवाने घेतले जातात, तर काही ठिकाणी शासकीय सवलतींचा लाभ मिळत असल्याने महिलांच्या नावाने परवाना घेण्याची प्रवृत्ती वाढत असल्याचे सांगितले जाते.

मद्यविक्री परवान्यांची जिल्ह्यातील स्थिती

जिल्ह्यातील मद्यविक्रीच्या परवान्यांमध्ये देशी दारू, विदेशी मद्य, बीअर शॉप आणि वाइन शॉप यांचा समावेश आहे. उपलब्ध आकडेवारीनुसार पुरुषांच्या नावावर सर्वाधिक परवाने असले तरी महिलांच्या नावावर असलेले परवानेही लक्षणीय प्रमाणात आहेत.

राज्य उत्पादन शुल्क विभागाचे स्पष्टीकरण

याबाबत राज्य उत्पादन शुल्क विभागाचे अधीक्षक नितीन धार्मिक यांनी सांगितले की, शासनाच्या नियमानुसार विहीत अटी पूर्ण करणाऱ्या कोणत्याही भारतीय नागरिकाला मद्य विक्रीचा परवाना दिला जातो. जिल्ह्यात महिलांच्या नावावर असलेले परवाने हे कायदेशीर प्रक्रियेचा भाग असून काही परवाने वारसा हक्काने, तर काही नवीन अर्जानुसार मंजूर करण्यात आले आहेत.

कोट्यवधींची उलाढाल

चंद्रपूर जिल्ह्यात वर्षभरात मद्यविक्रीची कोट्यवधी रुपयांची उलाढाल होत असल्याचे सांगितले जाते. शासनाच्या महसुलात मद्यविक्री व्यवसायाचा मोठा वाटा आहे. त्यामुळे मद्यविक्री परवान्यांची संख्या आणि त्यामधील महिलांचा सहभाग या विषयावर समाजात चर्चेला उधाण आले आहे.

सामाजिक प्रश्न अधिक गंभीर

एकीकडे महिलाच दारूबंदीच्या मागणीसाठी आक्रमक होत असताना दुसरीकडे महिलांच्या नावावर मोठ्या प्रमाणात मद्यदुकाने चालत असल्याची बाब अनेक प्रश्न निर्माण करणारी ठरत आहे. त्यामुळे ‘बाटली आडवी’ करण्याच्या घोषणा आणि वास्तवातील परिस्थिती यामध्ये मोठी दरी असल्याचे चित्र समोर येत आहे.