🚨 वरोरा उत्पादन शुल्काची मोठी कारवाई; बनावट व मध्यप्रदेश निर्मित विदेशी दारूसह चारचाकी जप्त — ₹6.40 लाखांचा मुद्देमाल जप्त 🚨

🚨 वरोरा उत्पादन शुल्काची मोठी कारवाई; बनावट व मध्यप्रदेश निर्मित विदेशी दारूसह चारचाकी जप्त — ₹6.40 लाखांचा मुद्देमाल जप्त 🚨

वरोरा (जि. चंद्रपूर)  :-   राज्य उत्पादन शुल्क विभाग, वरोरा यांच्या पथकाने मिळालेल्या गोपनीय माहितीच्या आधारे येनसा ते सोसायटी (मजरा) जाणाऱ्या मार्गावर अचूक सापळा रचून अवैधरित्या वाहतूक करण्यात येत असलेल्या मध्यप्रदेश निर्मित व बनावट विदेशी दारूचा मोठा साठा जप्त करण्यात यश मिळवले. दिनांक 18 नोव्हेंबर 2025 रोजी सायंकाळी अंदाजे 5 वाजता नागपूर–चंद्रपूर महामार्गावरून येत असलेल्या शॉवरलेट कंपनीच्या ग्रे रंगाच्या MH49-AS-0647 या चारचाकी वाहनाला पथकाने संशयावरून अडविले असता वाहनाच्या डिकीत नॉयलॉनच्या चुंगड्यांत मोठ्या प्रमाणात विदेशी मद्यसाठा आढळून आला. तपासणीदरम्यान एकूण 12 नॉयलॉनच्या चुंगड्या आढळल्या असून त्यापैकी 10 चुंगड्यांत रॉयल स्टॅग या ब्रँडच्या 180 मिली क्षमतेच्या प्रत्येकी 48 अशा एकूण 480 सीलबंद बॉटला मिळून आल्या. उर्वरित दोन चुंगड्यांमध्ये प्रथमदर्शनी बनावट असल्याचे निदर्शनास आलेल्या ‘रॉयल चॅलेंज’ या ब्रँडच्या 750 मिली क्षमतेच्या प्रत्येकी 12 अशा एकूण 24 सीलबंद बॉटला सापडल्या. हा संपूर्ण साठा मध्यप्रदेश निर्मित असून म. प्र. राज्यातच विक्रीस अधिकृत व महाराष्ट्रात विक्रीस प्रतिबंधित असताना त्याची अवैधरीत्या वाहतूक केली जात होती. सदर विदेशी मद्यसाठ्याची अंदाजे किंमत ₹1,44,960/- असून वाहतुकीसाठी वापरण्यात आलेले चारचाकी वाहनासह एकूण मुद्देमालाची किंमत ₹6,40,000/- इतक्या रकमेची आहे.

News reporter :- अतुल दिघाडे

या कारवाईत मनीष नंदकीशोर जयस्वाल (48 वर्षे, रा. न्यू संतराम मार्केट, नागपूर), विशाल शंभू मंडळ (28 वर्षे, रा. चनकापूर, ता. सावनेर, नागपूर) आणि सतीश नामदेव देवकर (31 वर्षे, रा. मालवीय वार्ड, वरोरा) या तिघांना घटनास्थळीच ताब्यात घेण्यात आले. परराज्यातील मद्याची महाराष्ट्रात अवैध वाहतूक आणि प्रथमदर्शनी बनावट विदेशी दारू आढळल्याने संबंधितांविरुद्ध महाराष्ट्र दारूबंदी कायदा 1949 अंतर्गत गुन्हा नोंदविण्यात आला आहे.

ही संपूर्ण कारवाई मा. डॉ. राजेश देशमुख (आयुक्त, राज्य उत्पादन शुल्क, महाराष्ट्र राज्य, मुंबई), मा. श्री. प्रसाद सुर्वे (सह आयुक्त, अंमलबजावणी व दक्षता, मुंबई), मा. श्री. गणेश पाटील (विभागीय उपआयुक्त, नागपूर विभाग) आणि मा. श्री. नितीन धार्मिक (अधीक्षक, राज्य उत्पादन शुल्क, चंद्रपूर) यांच्या मार्गदर्शनाखाली करण्यात आली. पथकात निरीक्षक प्रवीण मोहतकर, दुय्यम निरीक्षक सचिन पोलेवार, प्रमोद रजोते, हर्षराज इंगळे, सागर दिडसे, तसेच जवान विलास महाकुलकार (वाहन चालक), जगदीश मस्के, जितेंद्र आनंद, मंगेश कुयटे आणि अमोल भोयर यांनी सहभाग घेतला. सदर प्रकरणाचा पुढील तपास दुय्यम निरीक्षक श्री. सचिन पोलेवार, राज्य उत्पादन शुल्क, वरोरा-1 करीत आहेत.