📰 चंद्रपूर मनपा निवडणूक; भाजपमध्ये दोन गट सक्रिय

📰 चंद्रपूर मनपा निवडणूक; भाजपमध्ये दोन गट सक्रिय

इच्छुक उमेदवारांकडून स्वतंत्रपणे अर्ज मागवले; कार्यकर्त्यांमध्ये संभ्रम वाढला

चंद्रपूर :- चंद्रपूर महानगरपालिकेची निवडणूक जाहीर होण्याच्या दिशेने आता उलटी गिनती सुरू झाली आहे. निवडणुका काही दिवसांवर येऊन ठेपल्या असताना शहरातील राजकीय वातावरण चांगलेच तापू लागले आहे. विविध पक्षांमध्ये रणनीती आखण्याची लगबग सुरू झाली असली तरी भाजपमध्ये सुरू असलेल्या अंतर्गत हालचालींनी कार्यकर्ते आणि इच्छुक उमेदवारांमध्ये मोठी खळबळ उडवली आहे.

News Reporter :– अतुल दिघाडे

🔸 भाजपमध्ये दोन गट सक्रिय — स्वतंत्रपणे अर्ज मागवणी

भाजपमध्ये दोन वेगवेगळ्या गटांकडून स्वतंत्रपणे उमेदवारी अर्ज मागविण्यात येत असल्याचे समोर आल्यानंतर पक्षातील मतभेद चव्हाट्यावर आले आहेत.
शहरातील अनेक प्रभागांमध्ये या घडामोडींमुळे कार्यकर्त्यांमध्ये संभ्रमाचे वातावरण निर्माण झाले आहे.

🔸 एका गटात आमदार मुनगंटीवार गटाचे नेतृत्व

भाजपचे माजी जिल्हाध्यक्ष व माजी उपमहापौर राहुल पावडे यांनी आमदार सुधीर मुनगंटीवार यांच्या संपर्क कार्यालयात इच्छुकांकडून अर्ज मागवण्याची घोषणा केली आहे.
या गटाने १६ ते २० नोव्हेंबर या कालावधीत अर्ज स्वीकारण्याचे जाहीर केले आहे.

🔸 दुसऱ्या गटात आमदार किशोर जोरगेवार समर्थकांची हालचाल

तर दुसरीकडे, भाजप शहर जिल्हाध्यक्ष सुभाष कासनगोटूवार यांनी आमदार किशोर जोरगेवार यांच्या जनसंपर्क कार्यालयात इच्छुक उमेदवारांकडून अर्ज मागवले आहेत.
या गटाने १६ ते २१ नोव्हेंबर पर्यंत अर्ज मागवण्याची घोषणा केली असून दोन्ही पत्रकांमध्ये वेगवेगळे मार्गदर्शक नियम दिल्याने गोंधळ अधिकच वाढला आहे.

🔸 इच्छुक उमेदवारांमध्ये गोंधळ, कार्यकर्त्यांची मोठी ‘गोची’

दोन्ही गटांकडून एकाच काळात पण वेगवेगळ्या सूचनांसह अर्ज मागवले जात असल्यामुळे कोणत्या गटाकडे अर्ज द्यावा, कोणत्या गटाचे निर्देश मान्य करावेत, याबाबत कार्यकर्त्यांसमोर अडचण निर्माण झाली आहे.
अनेक प्रभागांमध्ये दोन्ही गटांकडे त्यांच्या समर्थकांनी अर्ज सादर केल्याचेही दिसत आहे.

🔸 निवडणुकीच्या तोंडावर गटबाजी उफाळली

सर्वांत महत्त्वाचे म्हणजे, मनपा निवडणुकीच्या अगदी तोंडावर भाजपमध्ये सुरू झालेल्या या गटबाजीने पक्षाची अंतर्गत परिस्थिती उघडी पडली आहे.
शहरात या घडामोडी मोठ्या चर्चेचा विषय बनल्या आहेत.
विरोधकांनीही या मतभेदांकडे लक्ष वेधून टीकास्त्र सोडण्यास सुरुवात केली आहे.

🔸 राजकीय वातावरण तापले; निवडणुकीचा माहोल रंगाला

चंद्रपूर मनपा निवडणुकीच्या तयारीला वेग येत असून, निवडणूक जाहीर होण्याआधीच शहरातील वातावरण तापले आहे.
भाजपमधील हे दोन गटाचे चित्र पाहता पुढील काही दिवसांत आणखी नाट्यमय घटनाक्रम घडण्याची शक्यता राजकीय वर्तुळात व्यक्त केली जात आहे.