📰 चंद्रपूरचा अभिमान! जनता महाविद्यालयाचा विद्यार्थी क्रांतिवीर सिडाम ‘इंद्रधनुष्य २०२५’ राज्यस्तरीय युवा महोत्सवासाठी निवड

 चंद्रपूरचा अभिमान! जनता महाविद्यालयाचा विद्यार्थी क्रांतिवीर सिडाम ‘इंद्रधनुष्य २०२५’ राज्यस्तरीय युवा महोत्सवासाठी निवड

चंद्रपूर, दि. ५ नोव्हेंबर २०२५ :- चांदा शिक्षण प्रसारक मंडळ संचालित जनता महाविद्यालय, चंद्रपूर येथील विद्यार्थी क्रांतिवीर संजय सिडाम याची राज्यस्तरीय आंतर विद्यापीठ सांस्कृतिक युवा महोत्सव ‘इंद्रधनुष्य २०२५’ साठी निवड झाली असून, त्याने चंद्रपूर जिल्ह्याचा मान उंचावला आहे.

News reporter :- अतुल दिघाडे

ही राज्यस्तरीय स्पर्धा दि. ५ ते ९ नोव्हेंबर २०२५ दरम्यान बहिणाबाई चौधरी उत्तर महाराष्ट्र विद्यापीठ, जळगाव येथे भव्य प्रमाणात आयोजित करण्यात आली आहे. राज्यातील विविध विद्यापीठांमधील विद्यार्थ्यांच्या सांस्कृतिक, कलात्मक व सर्जनशील कौशल्यांना व्यासपीठ मिळवून देणारा हा महोत्सव दरवर्षी मोठ्या उत्साहात साजरा होतो.

क्रांतिवीर सिडाम याने आपल्या निवडीबद्दल समाधान व्यक्त करताना सांगितले की, “ही संधी माझ्यासाठी प्रेरणादायी आहे. या यशाचे श्रेय मी माझ्या महाविद्यालयाला, शिक्षकांना आणि विशेषतः संस्थेचे सचिव डॉ. अशोक जिवतोडे व महाविद्यालयाचे प्राचार्य डॉ. आशिष के. महातळे यांच्या प्रोत्साहनाला देतो.”

या निमित्ताने महाविद्यालयात अभिनंदनाचा कार्यक्रम आयोजित करण्यात आला. प्रसंगी प्राचार्य डॉ. आशिष के. महातळे, विद्यार्थी विकास अधिकारी प्रा. एच. आर. आत्राम, रा.से.यो. कार्यक्रम अधिकारी प्रा. अमर बलकी, तसेच सर्व प्राध्यापक आणि शिक्षकेत्तर कर्मचारी उपस्थित होते. सर्वांनी क्रांतिवीरचे हार्दिक अभिनंदन करून त्याच्या पुढील वाटचालीस शुभेच्छा दिल्या.

प्राचार्य डॉ. महातळे यांनी यावेळी विद्यार्थ्यांना मार्गदर्शन करताना सांगितले की, “अशा सांस्कृतिक उपक्रमांमुळे विद्यार्थ्यांचा आत्मविश्वास, नेतृत्वगुण आणि व्यक्तिमत्व विकास घडतो. प्रत्येक विद्यार्थ्याने या संधींचा लाभ घेत आपल्या कलागुणांना वाव द्यावा.”

जनता महाविद्यालयातील या उल्लेखनीय यशामुळे महाविद्यालयाचे नाव पुन्हा एकदा राज्यस्तरावर झळकले आहे. क्रांतिवीर सिडामच्या या निवडीमुळे संपूर्ण चंद्रपूर जिल्ह्यात आनंदाचे वातावरण आहे.

जनता महाविद्यालय परिवाराने क्रांतिवीर सिडामचे मनःपूर्वक अभिनंदन करत त्याच्या उज्ज्वल भविष्यासाठी शुभेच्छा व्यक्त केल्या आहेत. 🎉 

____________________________________________________