📰 वडगाव प्रभागातील युवा चेहरा सोहम बुटले पुन्हा चर्चेत; आईनंतर मुलालाही तिकीट नाकारल्याने निर्माण झाली नाराजी — आता भाजप नव्या कार्यकारणीत देणार का मोठी जबाबदारी?

📰 वडगाव प्रभागातील युवा चेहरा सोहम बुटले पुन्हा चर्चेत;

आईनंतर मुलालाही तिकीट नाकारल्याने निर्माण झाली नाराजी — आता भाजप नव्या कार्यकारणीत देणार का मोठी जबाबदारी?

चंद्रपूर :-  भारतीय जनता पक्षाच्या (भाजप) नव्या कार्यकारणीच्या घडामोडींना सध्या वेग आला असून, वडगाव व सिव्हिल लाईन प्रभागातील नाराज कार्यकर्त्यांमध्ये पुन्हा एकदा आशा आणि उत्सुकता निर्माण झाली आहे. या पार्श्वभूमीवर वडगाव प्रभागातील युवा नेतृत्व म्हणून ओळख निर्माण केलेले सोहम सुदर्शन किरण बुटले हे नाव पुन्हा चर्चेत आले आहे.

वडगाव प्रभागात गेल्या काही निवडणुकांमध्ये तिकीट वाटपावरून मोठा वाद निर्माण झाला होता. विशेष बाब म्हणजे एकाच कुटुंबातील किरण सुदर्शन बुटले यांना याआधी तिकीट नाकारण्यात आले होते, आणि त्यानंतर त्यांच्या मुलगा सोहम बुटले यांनाही संधी नाकारण्यात आल्याने कार्यकर्त्यांमध्ये तीव्र नाराजी निर्माण झाली. या निर्णयाचा थेट परिणाम निवडणुकीवर दिसून आला आणि प्रभागातील चारही उमेदवारांना पराभवाचा सामना करावा लागला. त्यामुळे स्थानिक पातळीवर पक्षाला मोठा धक्का बसल्याचे मानले जाते.

स्थानिक कार्यकर्त्यांच्या मते, “जर त्या वेळी युवा चेहरा म्हणून सोहम बुटले यांना तिकीट देण्यात आले असते, तर आज वडगाव प्रभागातील राजकीय चित्र पूर्णपणे वेगळे दिसले असते.” विशेषतः युवकांमध्ये त्यांची मजबूत पकड, जनसंपर्कातील कौशल्य आणि सामाजिक कार्यातील सक्रियता यामुळे त्यांच्याकडे एक सक्षम पर्याय म्हणून पाहिले जात होते.

सोहम बुटले हे उच्च शिक्षित असून, त्यांनी अल्पावधीतच वडगाव प्रभागात स्वतःची वेगळी ओळख निर्माण केली आहे. गरजू नागरिकांना मदत करणे, युवकांना एकत्र आणणे आणि स्थानिक प्रश्नांवर सातत्याने आवाज उठवणे, या त्यांच्या कार्यपद्धतीमुळे त्यांना मोठ्या प्रमाणात जनसमर्थन मिळाले आहे. त्यामुळेच तिकीट नाकारल्यामुळे निर्माण झालेली नाराजी ही केवळ वैयक्तिक नसून व्यापक पातळीवर पक्षासाठी नुकसानकारक ठरली, असेही निरीक्षकांचे मत आहे.

आता भाजपकडून नव्या कार्यकारणीची घोषणा लवकरच होण्याची शक्यता व्यक्त केली जात आहे. या पार्श्वभूमीवर, पक्ष नाराज कार्यकर्त्यांना पुन्हा एकत्र आणण्यासाठी आणि संघटनात्मक ताकद वाढवण्यासाठी युवा नेतृत्वाला पुढे आणेल का, याकडे सर्वांचे लक्ष लागले आहे. विशेषतः सोहम बुटले यांना एखादी महत्त्वाची जबाबदारी देऊन वडगाव प्रभागातील नाराजी दूर करण्याचा प्रयत्न केला जाईल का, हा मोठा प्रश्न उपस्थित होत आहे.

स्थानिक पातळीवर असा विश्वास व्यक्त केला जात आहे की, “जर सोहम बुटले यांना योग्य संधी देण्यात आली, तर केवळ नाराजी कमी होणार नाही, तर वडगाव प्रभागात पुन्हा एकदा ‘कमळ’ फुलण्याची शक्यता वाढेल.”

आता येणाऱ्या काही दिवसांत भाजप नेतृत्व कोणता निर्णय घेते, आणि सोहम बुटले यांचे राजकीय भवितव्य कोणत्या दिशेने वळते, याकडे संपूर्ण चंद्रपूर शहरांचे व वडगाव प्रभागातील नागरिकांनचे लक्ष लागले आहे.