📰 जटपुरा गेट परिसरातील वीज समस्येकडे अॅड. राहुल घोटेकर यांचे लक्ष – तात्काळ कार्यवाहीची मागणी!

📰 जटपुरा गेट परिसरातील वीज समस्येकडे अॅड. राहुल घोटेकर यांचे लक्ष – तात्काळ कार्यवाहीची मागणी!

चंद्रपूर :-  जटपुरा गेट परिसरात कोणतीही पूर्वसूचना न देता वारंवार आणि तासन्तास वीज पुरवठा खंडित केला जात असल्याने नागरिकांमध्ये प्रचंड नाराजी निर्माण झाली आहे. परिसरातील वाढत्या वीज समस्येकडे गांभीर्याने लक्ष देत माजी नगरसेवक व सामाजिक कार्यकर्ते अॅड. राहुल अरुणजी घोटेकर यांनी महाराष्ट्र राज्य वीज वितरण कंपनी मर्यादित (MSEDCL), चंद्रपूर शहर विभागाकडे तत्काळ लेखी तक्रार दाखल केली.

News reporter :- अतुल दिघाडे

अॅड. घोटेकर यांनी आपल्या निवेदनात नमूद केले की, जटपुरा गेट परिसरात मागील काही महिन्यांपासून दिवसभरात अनेक वेळा अचानक वीजपुरवठा खंडित केला जात आहे. काही वेळा तर सलग ४ ते ५ तास वीज नसल्याने परिसरातील दैनंदिन जीवन आणि कामकाजावर मोठा परिणाम होत आहे.

तक्रारीत त्यांनी वीज विभागाचे लक्ष वेधत स्पष्ट नमूद केले की, अशा प्रकारचे वारंवार वीज खंडित करणे नागरिकांवर अन्यायकारक असून, वीज वितरण व्यवस्थेतील दोष दूर करून परिसरात स्थिर आणि नियमित वीजपुरवठा सुरू ठेवणे अत्यावश्यक आहे.

अॅड. घोटेकर यांनी वीज विभागास तात्काळ उपाययोजना करून परिसरातील वीज पुरवठा सुरळीत करण्याचे निर्देश दिले आहेत. भविष्यात कोणत्याही कारणासाठी वीजपुरवठा खंडित करावा लागल्यास पूर्वसूचना देणे आवश्यक असल्याचेही त्यांनी नमूद केले.

निवेदन देत त्यांनी सांगितले की,
“जटपुरा गेट परिसरातील नागरिकांच्या समस्या मांडणे आणि त्यावर उपाय मिळवणे ही माझी जबाबदारी आहे. वीज ही मूलभूत गरज आहे; अनावश्यक खंडिती थांबवून नागरिकांना दिलासा मिळणे आवश्यक आहे.”

अॅड. राहुल घोटेकर यांच्या या पुढाकाराचे परिसरातील नागरिकांनी स्वागत केले असून, वीज विभाग आता यात तातडीची दखल घेईल, अशी अपेक्षा व्यक्त केली जात आहे.