🍷 लोहारा जंक्शन बार अॅण्ड रेस्टॉरंटमध्ये १८.५४ लाखांचा अपहार : मॅनेजरविरुद्ध रामनगर पोलिसांत गुन्हा दाखल

🍷 लोहारा जंक्शन बार अॅण्ड रेस्टॉरंटमध्ये १८.५४ लाखांचा अपहार : मॅनेजरविरुद्ध रामनगर पोलिसांत गुन्हा दाखल

चंद्रपूर :- शहरातील रामनगर परिसरात असलेल्या लोहारा जंक्शन बार अॅण्ड रेस्टॉरंट येथे विश्वासाला तडा देणारी गंभीर आर्थिक फसवणुकीची घटना उघडकीस आली आहे. बारचा कारभार सांभाळणाऱ्या मॅनेजरने तब्बल १८ लाख ५४ हजार रुपयांचा अपहार केल्याचा धक्कादायक प्रकार समोर आला असून, याप्रकरणी रामनगर पोलीस ठाण्यात गुन्हा दाखल करण्यात आला आहे.

News reporter :- अतुल दिघाडे

मिळालेल्या माहितीनुसार, फिर्यादी जितेंद्र चंद्रकुमार तलरेजा (वय ५५) हे हॉटेल व्यवसायिक असून त्यांचा नागपूर रोड व मुल रोड परिसरात लोहारा जंक्शन बार अॅण्ड रेस्टॉरंट हा व्यवसाय आहे. त्यांनी आपल्या व्यवसायाचा संपूर्ण कारभार विश्वासाने मॅनेजर दीपक नारायण अडपेवार याच्याकडे सोपविला होता.

बारमध्ये रोज विक्री होणाऱ्या विदेशी मद्याचा सविस्तर हिशोब स्टॉक रजिस्टरमध्ये नोंदविला जात होता. मात्र, २४ डिसेंबर २०२५ रोजी तलरेजा यांनी रजिस्टरची तपासणी केली असता ओपनिंग व क्लोजिंग स्टॉकमध्ये मोठी तफावत आढळली. यानंतर सखोल चौकशी केल्यावर ऑक्टोबर २०२३ ते फेब्रुवारी २०२६ या कालावधीत विविध ब्रँडच्या मद्याच्या नोंदीत फेरफार करून मोठ्या प्रमाणात आर्थिक गैरव्यवहार केल्याचे स्पष्ट झाले.

या गैरव्यवहारातून एकूण १८ लाख ५४ हजार रुपयांचा अपहार झाल्याचे निष्पन्न झाले आहे. याबाबत विचारणा केली असता आरोपीने रक्कम परत करण्याचे आश्वासन देत तीन धनादेश दिले होते. मात्र, ठरलेल्या वेळेत पैसे परत न करता उलट फिर्यादींनाच कायदेशीर नोटीस पाठविल्याने प्रकरण अधिकच गुंतागुंतीचे झाले.

शेवटी, फिर्यादींनी रामनगर पोलीस ठाण्यात धाव घेत तक्रार दाखल केली. पोलिसांनी या प्रकरणी भारतीय न्याय संहिता अंतर्गत कलम ३१६, ३१८ (४) व ३३६ अन्वये गुन्हा नोंदविला आहे.

सध्या या प्रकरणाचा पुढील तपास पोलीस निरीक्षक आसिफराजा शेख यांच्या मार्गदर्शनाखाली सहाय्यक पोलीस निरीक्षक देवाजी नरोटे करीत असून, या घटनेमुळे शहरातील हॉटेल व्यावसायिकांमध्ये खळबळ उडाली आहे.

🔎 विश्वासघाताची ही घटना व्यवसायिकांसाठी इशारा या प्रकरणामुळे व्यवसायात आर्थिक व्यवहार करताना योग्य देखरेख व पारदर्शकता किती महत्त्वाची आहे, हे पुन्हा एकदा अधोरेखित झाले आहे. नियमित लेखापरीक्षण आणि जबाबदाऱ्या स्पष्ट ठेवणे गरजेचे असल्याची चर्चा व्यावसायिकांमध्ये सुरू आहे.