🔥चंद्रपूर महापालिकेत खळबळ! अतिक्रमण विभागातील कंत्राटी इंजिनिअर ACB च्या जाळ्यात; १.३० लाखांच्या लाच प्रकरणाने शहर हादरले🔥

🔥चंद्रपूर महापालिकेत खळबळ! अतिक्रमण विभागातील कंत्राटी इंजिनिअर ACB च्या जाळ्यात; १.३० लाखांच्या लाच प्रकरणाने शहर हादरले🔥

चंद्रपूर :- चंद्रपूर महानगरपालिकेच्या अतिक्रमण विभागातील भ्रष्टाचाराचा धक्कादायक प्रकार समोर आला असून एका कंत्राटी इंजिनिअरला १ लाख ३० हजार रुपयांची लाच स्वीकारताना लाचलुचपत प्रतिबंधक विभागाने (ACB) रंगेहात पकडल्याने शहरात मोठी खळबळ उडाली आहे. या प्रकरणामुळे महापालिकेच्या कारभारावर गंभीर प्रश्नचिन्ह उपस्थित झाले असून नागरिकांमध्ये तीव्र संताप व्यक्त होत आहे.

News reporter :- अतुल दिघाडे

मिळालेल्या प्राथमिक माहितीनुसार, शुभम वर्घाट असे अटक करण्यात आलेल्या कंत्राटी इंजिनिअरचे नाव आहे. संबंधित तक्रारदाराचे काम मंजूर करून देण्यासाठी आणि फाईल पुढे सरकवण्यासाठी त्यांनी १ लाख ३० हजार रुपयांची लाच मागितल्याची तक्रार ACB कडे करण्यात आली होती. तक्रारीची पडताळणी केल्यानंतर ACB च्या पथकाने सापळा रचला.

धक्कादायक बाब म्हणजे, आरोपीने ही रक्कम थेट स्वतःकडे न घेता एका खासगी व्यक्तीमार्फत स्वीकारण्याचा प्रयत्न केला. मात्र ACB च्या अधिकाऱ्यांनी अचूक नियोजन करून सापळा यशस्वी केला आणि लाचेची रक्कम स्वीकारताना आरोपीला रंगेहात पकडले. त्यानंतर तात्काळ कारवाई करत आरोपीला ताब्यात घेण्यात आले.

या घटनेमुळे चंद्रपूर महानगरपालिकेच्या प्रशासनावर मोठे प्रश्न उपस्थित झाले आहेत. अतिक्रमण विभागात कामे मंजूर करण्यासाठी पैशांची मागणी होत असल्याची चर्चा आधीपासूनच शहरात सुरू होती. मात्र आता प्रत्यक्ष कारवाई झाल्याने अनेक धक्कादायक बाबी पुढे येण्याची शक्यता व्यक्त केली जात आहे.

दरम्यान, महापालिकेत नुकतीच सत्ता स्थापन झाल्यानंतर लगेचच असा प्रकार उघडकीस आल्याने राजकीय वर्तुळातही खळबळ माजली आहे. नागरिकांमध्येही विविध चर्चा रंगल्या असून, हा प्रकार केवळ एका कंत्राटी इंजिनिअरपुरता मर्यादित आहे की यामागे मोठे रॅकेट कार्यरत आहे का, असा प्रश्न उपस्थित केला जात आहे.

शहरातील नागरिकांचा असा आरोप आहे की, अतिक्रमण, बांधकाम आणि फाईल मंजुरीसाठी काही अधिकाऱ्यांकडून पैशांची मागणी होत असल्याच्या तक्रारी आधीपासूनच ऐकायला मिळत होत्या. त्यामुळे या प्रकरणाची सखोल चौकशी झाल्यास आणखी मोठे मासे गळाला लागण्याची शक्यता नाकारता येत नाही.

सध्या ACB कडून पुढील तपास सुरू असून, या प्रकरणात आणखी कोणाचा सहभाग आहे का, याचाही तपास केला जात आहे. येत्या काळात या चौकशीतून अनेक धक्कादायक खुलासे होण्याची शक्यता व्यक्त होत आहे.