🗞️ प्रदेशाध्यक्षांच्या उमेदवार यादीला जोरगेवारांनी दाखवली ‘केराची टोपली

🗞️ प्रदेशाध्यक्षांच्या उमेदवार यादीला जोरगेवारांनी दाखवली ‘केराची टोपली’

चंद्रपूर भाजपमध्ये राजकीय भूकंप; सुभाष कासनगोटूवार यांची तात्काळ हकालपट्टी

चंद्रपूर :- भारतीय जनता पार्टी म्हणजे शिस्त, संघटन आणि आदेशपालन अशी ओळख मानली जाते. मात्र चंद्रपूर महानगरपालिकेच्या निवडणुकीत हीच शिस्त पूर्णपणे धाब्यावर बसवण्यात आल्याचे धक्कादायक चित्र समोर आले आहे. प्रदेश भाजपाने अंतिम करून पाठवलेली उमेदवारांची यादी चंद्रपूरमध्ये अक्षरशः केराची टोपली दाखवत बदलण्यात आल्याचा गंभीर आरोप होत असून, यामुळे भाजपच्या चंद्रपूर शहर संघटनेत तीव्र संतापाची लाट उसळली आहे.

News reporter :- अतुल दिघाडे

प्राप्त माहितीनुसार, निवडणूक निरीक्षक आणि निवडणूक प्रमुख आमदार यांनी, प्रदेशाध्यक्ष यांच्या मान्यतेनंतरही तब्बल १३ उमेदवारांची नावे परस्पर वगळल्याची माहिती समोर आली आहे. प्रदेश पातळीवरून आलेली यादी ही साधारणतः अंतिम मानली जाते; मात्र चंद्रपूरमध्ये ही परंपरा मोडीत काढण्यात आल्याचे आरोप होत आहेत.

प्रदेशाध्यक्षांच्या सहीची यादी; नंतर नावे ‘गायब’

भारतीय जनता पार्टी, महाराष्ट्र यांच्या वतीने प्रदेशाध्यक्ष रवींद्र चव्हाण यांच्या सहीने पहिली अधिकृत उमेदवार यादी जाहीर करण्यात आली होती. या यादीत खालील उमेदवारांची नावे समाविष्ट होती; मात्र नंतर ही नावे वगळण्यात आल्याचे समोर आले आहे—

वगळण्यात आलेली नावे (१३):

1. प्रभाग क्र. १ – सौ. माया उईके
2. प्रभाग क्र. ३ – पूजा पोतराजे
3. प्रभाग क्र. ४ – अजय विमल सरकार
4. प्रभाग क्र. ७ – मनीषा मिथुला महताब
5. प्रभाग क्र. ८ – सत्यम संजय गाणार
6. प्रभाग क्र. १० – सौ. शुभांगी अनिल दिकोंडावार
7. प्रभाग क्र. ११ – शितल मारुती कुलमेथे
8. प्रभाग क्र. १२ – वंदना ताराचंद्र भागवत
9. प्रभाग क्र. १२ (वार्ड ड) – गणेश शंकर रामगुंडावार
10. प्रभाग क्र. १३ – सौ. रेखा बबन दातारकर
11. प्रभाग क्र. १३ (वार्ड ड) – कुणाल रमेश गुंडावार
12. प्रभाग क्र. १४ (वार्ड अ) – सौ. पंचशीला अनुप चिवंडे
13. प्रभाग क्र. १४ – हरीश विजय मंचलवार

या प्रकारामुळे वर्षानुवर्षे पक्षासाठी काम करणाऱ्या निष्ठावान कार्यकर्त्यांना डावलल्याची भावना तीव्र झाली असून, आपल्या मर्जीतील उमेदवारांना तिकीट देण्यात आल्याचे आरोप उघडपणे होत आहेत.

मनमानी निर्णयांचे आरोप; अपक्ष लढण्यास भाग पाडल्याचा दावा

महापालिका निवडणूक जाहीर झाल्यापासून राज्यभरात राजकीय घडामोडी घडत असताना, चंद्रपूरमधील भाजपमधील अंतर्गत गोंधळ मात्र राज्यात सर्वाधिक चर्चेत आला आहे. निवडणूक प्रमुख म्हणून आमदार किशोर जोरगेवार यांच्याकडे जबाबदारी देण्यात आली असली, तरी निरीक्षक चैनसुख संचेती आणि निवडणूक प्रमुखांनी मनमानी निर्णय घेतल्याचे आरोप सातत्याने होत आहेत. निवडून येण्याची क्षमता असलेल्या प्रभावी उमेदवारांची तिकिटे कापून त्यांना अपक्ष लढण्यास भाग पाडून भाजपच्या जागा कमी करण्याचा घाट घातल्याचा आरोपही कार्यकर्त्यांकडून केला जात आहे.

मोठी शिस्तभंग कारवाई : सुभाष कासनगोटूवार यांची हकालपट्टी

या साऱ्या गोंधळाच्या पार्श्वभूमीवर भाजपने मोठी शिस्तभंगाची कारवाई करत यांची तात्काळ हकालपट्टी केली आहे.
दि. ३१ डिसेंबर २०२५ रोजी भारतीय जनता पार्टी, महाराष्ट्र कार्यालयातून काढण्यात आलेल्या अधिकृत पत्रानुसार, सुभाष कासनगोटूवार यांना भाजप चंद्रपूर महानगर अध्यक्ष पदावरून तात्काळ पदमुक्त करण्यात आल्याचे स्पष्ट नमूद आहे. हे पत्र कार्यालय सचिव (मुकुंद कुलकर्णी) यांच्या सहीने जारी करण्यात आले असून, या कारवाईमुळे चंद्रपूर भाजपमध्ये खळबळ उडाली आहे.

पक्ष नेतृत्वाकडे आता सर्वांचे लक्ष

प्रदेशाध्यक्षांच्या निर्णयालाच न जुमानता उमेदवारी वाटप झाल्याचा हा प्रकार सध्या चंद्रपूरच्या राजकारणात केंद्रस्थानी आहे. या कथित मनमानीमुळे भाजपमध्ये बंडखोरीला खतपाणी मिळणार का, पक्षाची निवडणुकीतील ताकद कमी होणार का, आणि पक्षश्रेष्ठी यावर आणखी कठोर कारवाई करणार का—याकडे आता संपूर्ण राज्याचे लक्ष लागले आहे.