📰 सुधीर मुनगंटीवार यांचा महिलांच्या स्वावलंबनासाठी पुढाकार — बल्लारपूरमध्ये ‘स्व. सुषमा स्वराज कौशल्य विकास केंद्र’ लवकरच सुरू!

 सुधीर मुनगंटीवार यांचा महिलांच्या स्वावलंबनासाठी पुढाकार — बल्लारपूरमध्ये ‘स्व. सुषमा स्वराज कौशल्य विकास केंद्र’ लवकरच सुरू!

चंद्रपूर  :-  बल्लारपूर (जि. चंद्रपूर) येथील स्व. सुषमा स्वराज कौशल्य विकास केंद्राला आज राज्याचे वनमंत्री व बल्लारपूरचे आमदार सुधीर मुनगंटीवार यांनी भेट देऊन केंद्रातील सुविधा, प्रशिक्षण व्यवस्था आणि उद्घाटनाच्या तयारीचा सविस्तर आढावा घेतला.

News reporter :- अतुल दिघाडे

या भेटीदरम्यान त्यांनी विविध प्रशिक्षण विभागांची पाहणी करून तेथील यंत्रसामग्री, वर्गांची रचना, प्रशिक्षकांची उपलब्धता आणि महिला उमेदवारांसाठीच्या सोयी यांची माहिती घेतली. मुनगंटीवार यांनी सांगितले की, “महिला व मुलींसाठी स्वतंत्र कौशल्य विकास केंद्राची माझी इच्छा आज प्रत्यक्षात उतरत आहे. या केंद्रामुळे महिलांना रोजगारक्षम बनविण्याबरोबरच त्यांच्या आत्मनिर्भरतेचा मार्ग खुला होईल.”

हे केंद्र विविध कौशल्यवर्धक अभ्यासक्रमांसाठी प्रसिद्ध होणार असून शिवणकाम, संगणक प्रशिक्षण, ब्युटी पार्लर, हस्तकला, उद्योजकता विकास यांसारख्या अनेक उपयुक्त प्रशिक्षणांचा समावेश असेल. स्थानिक महिलांना व तरुणींना आर्थिक दृष्ट्या सक्षम करण्यासाठी हे केंद्र मोलाची भूमिका बजावेल, असा विश्वास सुधीर मुनगंटीवार यांनी व्यक्त केला.

स्थानिक जनतेत या उपक्रमाबद्दल उत्साह असून लवकरच होणाऱ्या उद्घाटनाची तयारी जोरात सुरू आहे.